BB發燒唔退點算好....?

發燒可以話係BB發病的第一樣症狀，等家長知道BB身體出現異常，係免疫功能的一種。BB未識講野，所以佢地會用其他方法表達唔舒服，好似反應遲緩、不停喊、食慾不振、昏睡、出汗等等，當有呢d情況出現時，就要特別留意BB的體溫變化！

BB發燒的原因有好多，除左因受細菌(Bacteria)、病毒(Virus)感染例如過濾性病毒、流感、中耳炎、尿道炎等，亦可能係出疹或者係打完防疫針後所出現的反應。出疹前BB多數會連續幾日發燒，之後身體先會出現紅疹。發燒亦可以是環境因素的影響，好似天氣太熱、衣服過厚、中暑、脫水等等。

體溫的上升係由下丘腦控制，下丘腦主要調節體溫，作病時身體會釋放抗體，抗體在對抗病菌時會產生熱源(Pyrogen)，令下丘腦調高體溫，形成發燒的症狀。其中，如果係過濾性病毒(Virus)感染的話，BB就會半夜先發燒，早上就冇燒，因為病毒係半夜較為活躍。一般的病毒感染都唔需要食抗生素，只需要食退燒藥，勁飲水同多休息，如果仲係飲緊奶的話，可以轉飲豆奶好似Isomil都會令BB快ｄ好返。

探肛門可以話係最準確的探熱方式，其次是探耳朵，之後是探腋下。而探唔同的部位有唔同的發燒度數，耳探溫度超過37.5oC，肛探超過38oC或腋探超過37oC就代表發燒。如體溫持續高過39 oC不退，而且有嘔吐、抽筋等現象就應即刻去睇醫生！

---

要幫BB散熱，可以用暖水同佢沖涼或者不時用暖水濕毛巾幫佢抺身，唔好幫BB著太多衫，因為咁會好難散熱。BB的衣服應以棉質為主，容易吸汗。當BB出汗之後，要換左濕衣服以免BB覺到唔舒服。要保持屋企空氣流通，仲有比BB飲番多d水，因為當BB體溫上升時，身體會排走多d汗水以助降溫，所以要飲夠水以防脫水。

有病時就要小心飲食，由於香港的環境同空氣污染較嚴重，令BB免疫力較弱，所以仲飲緊奶粉的BB係病果幾日可以轉飲豆奶粉如Isomil，如巳經食緊固體食物的BB，可以食一至兩日白粥加少少菜或者米糊。待情況好轉之後可加入肉類同蔬果，等BB可以吸收唔同的營養素。而水果就要停食直至退燒為止。含維他命A的紅蘿蔔、番薯(但有敏感底如皮膚敏感、氣管敏感者不宜)能維持鼻膜、肺和黏膜等呼吸系統的健康。維他命C如奇異果、橙有助保護細胞，增強免疫力，仲有助鐵質吸收。肉類、全穀類內含的鋅能促進免疫系統的正常運作，有助於預防感冒和流感，亦可對抗病菌。充足的休息對對抗病菌都好重要。

最常見的退燒藥有Ibuprofen同Paracetamol，發高燒可用Ibuprofen(需飽肚服)，而普通低燒就可用Paracetamol(可空肚或飽肚服)，如果夜晚發高燒可以兩者一齊係訓前服用。但如果BB對亞士匹靈敏感的話，就唔可以食Ibuprofen了!適當的使用退燒藥雖然有助暫時退燒，舒緩症狀，但最重要都係了解發燒的原因，因為治病比退燒更重要!